NOFY LALINA (Njakahery ANDRIAMALALA)

NOFY LALINA

Tsy tsaroana ny eto an-tany,
Fa toa nofoanan'ny eritreritro,
Fa any anaty nofiko any,
Tena tony izany feriko

Fa iny alina manontolo,
Toa vita sary iray ihany,
Dia foana daholo,
Na ny sento na tomany

Ao anaty masoko ao,
Endrikao tsy analana,
Sady fiainam-baovao,
Ny ririnina nihanafana

Ao anaty sofiko ao,
Feo manaitra ny any anatiko,
Tsaroako foana izao fandrao,
Ny hiery anao anie tsy tantiko

Ao an-tsaina avokoa,
Na hatramin'ny famindra,
Ny hany sisa ao am-po,
Ianao no mamiko indrindra

Toa tsy mba re akory,
Raha izany havizanana,
Na ity fo izay tena ory,
Nangina koa f'ianao no namana

Nangina hatramin'irony lasako,
Ny ho avy tsy nosainina akory,
Ny anilanao ny anio no fantatro,
Foana koa ny sorisory

Toa tsisy tsapako intsony,
Ny setrasetran'onjam-piainako,
Efa tony dia tony,
Ny sentonao ry fo fitiavako

Dia tonga hatramin'ny voady,
Fa hoe ny aina no fetra,
Amin-karona sy angady,
Hiara-hiady tsisy fetra

Any am-poko tsamirery,
Any anaty nofiko any,
Any an'eritreritro any,
Any anatin-tsainko any,
Raha izany rehetra izany

Njakahery ANDRIAMALALA
(18 Novembre 2022)
--------