FISARAHANA (Ny Andri - Fara)

FISARAHANA
Indray harivariva izay
Sendra irery tao an-trano.
Nisy embona tsy nahy ,
Nameno ilay fanahiko .

Nitamberina ilay nenina
Dia ny fiainako fahiny .
Teo anilan-jazavavy iray ,
Notolorako fitiavana .

Ianao ilay ninia
Nandratra izato foko .
Nefa ny fitiavako...,
Tsy miova hatramin'izao .

Iny lanitra iny
Mbola ho avy ka hitsara .
Izay rehetra vitatsika ,
Voarakitra ho tantara .

Tadidiko ilay toky
Izay nomenao ahy taloha .
Eny , mbola nohajaiko !
Noho ny fitiavako anao .

Eny ! 'ty nofoko malemy
No hiandry anao any am-parany ,
Ny fitivako anao...,
Any ankoatra no andrasako .

Izay no hafatra apetrako
Fa ny teny omeko anao .
Ny dina izay natao ...,
Nahoana no nasiana fetrany .

Hisaraka isika noho ianao
Aoka tsy ho vonto-dranomaso .
Fa izao no sitrakao....,
Dia veloma no ataoko .

Iza! iza no nandrara
'lay fitiavako madio madio .
Ka nisalorako voaly mainty ;
Ho mariky ny alaheloko .

Ity foko mahonena
Izay mahantra sy mijaly .
Fa tsarovy kosa hoy aho ,
Fa mbola hisy fanenenana .

Asa na mbola hisy
'lay fotoana mbola hihaonana .
Mba afahako mamela...,
'ty helokao fahiny .

Androany anefa toa tsaroako
Ilay fiarahantsika niara-dia .
Isan'andro vaky izao...,
Teny am-pianaranao .

Eny...! eritreritra ny ahy
Eritreritra mangina .
Eritreritro androany ,
Noho ilay ankason'olon-tiako .

Tsy ho ela intsony angamba
Ilay fotoana izay hodiako.
Dia hilofika ny nofoko...,
'ty vatako mahantra .

Tsy hilamina ny saiko
Tsy ho tony izato foko .
Raha tsy ianao indray...,
No hiverina eo anilako .

Nefa rediredy ny ahy
F'efa izao no sitrakao .
Ka zakaiko samy irery ...,
Noho ilay ditranao .

Kanefa izao no hiangaviako .
Izay rehetra tsy nekena .
Dia aoka ho ahy irery ,
Fa efa izay no anjarako .

Aoka anefa ho fantatrao
F'izay rehetra alehanao .
Hitantara izay natrehanao ;
Fa tiako ianao no lasa indray .


06.11.02 Raphael Spartacus / Ny Andri-fara
--------