Ilay feo (RAKOTOMANANA Christian Gabriel)

Tany karakaraina lavitry ny ando
Izato fanahy toa verivery dia
Mavesatra mitombo isan'andro
Tsy mampifantoka fa mampiriaria

Betsaka no hita betsaka no niaianana
Ny andro anio ho tanterahina, izay mitranga tsy hitarainana
Ny rahampitso ho torak'izany
Dia ho toy izany hatrany hatrany

Vao mifoha maraina, ny maso mijery
Ngazana no hita ny saina teritery
Manontany tena ny amin' ny antom-pisiana
Boda ny loha, iny dia variana

Entin'ny eritretitra any ambadika any
Injany misy feo, feo mitomany
Nozohiko ny ako, manintona ahy ny zava-mitranga
Ny tenako no hita, hita manangasanga

Natomboka ny resaka, natao fifamaliana
Napetraka ny olana iarahana hodinihana
Voafintina ny rehetra, milamina ny paikady
Izany no atao miaraka, mba tsy hiaraka any an-kady

Nampiharina ny zotra ka lafitra aok'izany
Tanteraka ny vina, satria koa niampy ny fahefàny
Toa ary ny rehetra, maivana ny anaty
Mirana ny endrika tsy endrika voabaty

Alina ny andro, injany indray ilay feo
Efa mahazatra izany ka tsy hatao hankaleo
Tonga indray izy, hametra-panontaniana
Ny amin'ny rahampitso, ka nahangataka ahy mba ho liana

Mialohan'izay anefa, tiany no nampahafantatra
Androany tsy voalohany, tsy farany na koa hoe santatra
Nolazainy t@ feo tsotra malefaka
Fa miaraka aminy izaho ho ravo sy ho faly fa tsy mba ho reraka

RAKOTOMANANA Christian Gabriel
--------