Sain-davitra (Lemady)

Raha tsapanao mandreraka
ny hazakazaky ny tany
ka manomboka mahafanina
ny fihodiny isan'andro,

Mijanóna kely hilaozany
ny hariva maty masoandro
fa ho avy haka anao
ny vola-tsinankerinandro
rehef'izahay azon-dohan-tory.

Hitondra anao an'habaka,
Hitazan-davitra tsy hiamboho,
ny hazavana sy ny haizina
nifampizaratsika mitovy.

Dia manisà efatra ambin'ny folo
mandra-pifamadi-toerana
ny tinaratra amin'ny aloka
Eo ianao no miandry ahy
Fa efa lalako ihany iny.
--------