HIKIMPY AHO RY TOMPO (Aina Nirina)

HIKIMPY AHO RY TOMPO

Hikimpy aho ry Tompo raha hivavaka Aminao,
Satria tsy te-hahita an’izao tontolo izao,
Fa manodoka ihany ny zava-tsoan’ny tany :
Ny hiratr’hazavany ankosotra ihany…

Aleoko mihitsy aloha hakimpiko ny masoko,
Fa tsy te-hahita ny hamaintin’ny ankasoko…
Aleoko hamirapiratra ao anatiko ao :
Ny zava an-tsefan-drahona haneho ny Herinao…

Hikimpy aho ry Tompo, aleo mihitsy hifantoka,
Fa ny maso adala tena tsy azoko antoka :
‘Ndrao dia hitsipalotra, hahatazana tsy nahy,
Ny seho mety hitondra ny fakam-panahy…

Hikimpy aho ry Tompo rehefa ilay hivavaka,
Hiresaka Aminao amin’ny fomba miavaka,
Hikimpy aho hahita sy handre ny hafatrao :
« Tompo ô ! Mitenena, hoy ity mpanomponao. »

AINA NIRINA
(21 oktobra 2014 tamin’ny 20 :50)
--------