You are here: home > Vetso

Manam-petra - anarim

Fa fony vao nitsiry ho anao ny fitiavako
Dia efa fantatro ny halalin’ny rano nirobohako
Saingy sarotra sy mafy tamiko rahavako
Ny tsy hisotro izany ka avy hatrany dia nogohako

Tamin’izany dia efa haiko fa hanam-petra ihany
Ilay fiarahantsika ninia nanaram-po
Ankehitriny, tonga ny toloko sy tomany
Mafaitra lotra izato ngidiny, mila tsy ho tò

Eny ekeko, fa efa nampiomana ahy mialoha
Ny elanelan-tany rahatrizay tonga ny fotoana
Saingy tiako ianao ka ataoko ahoana moa ?
Tafasaraka aminao ankehitriny vao mimaona

Aoka ho fantatrao anefa fa ny vita tsy anenenako
Ny amin’izay natolotrao sy izay nomeko koa
Fa na ny aiko, na ny saiko, na ny foko na ny tenako
Mankasitraka tanteraka, tsy hanadino antsika roa

Tsy misy tompon’ny hoavy na izaho na ianao
Fa sanatriaviko ihany raha toa isika tsy hihaona
Ny elanelan-tany no mampisaraka aminao
Fa ao anatiko ao ianao velona mandava-taona

Indrisy ry elanelan-tany, resinao aho ankehitriny
Nefa ataoko ahoana moa... mangina aho ary manaiky
Ary aza dia latsaina raha mitobaka ny siny
Fa feno loatra izato foko, ka zary sina manjokaiky

Manantena aho ry tiako ny mbola hifankahita
Nefa apetrako amin’ny Avo ny fandaharana izany
Izy irery ihany ny fanilo hampiampita
Zay mba vetsom-ponao ho ahiko, hamafako ny tomany.

Sokajy : Fisarahana

Hevitra mandeha

Fenohery (02/06/2006 13:28:49)

Sao dia tsy mety loatra rise ny miforitra anaty ah? Ary moa mba efa nosaininao koa ny embona mandazo ny fitiavany! Raha nalaiko fanahy izy mba hilaza izay ao am-pony, dia tsy amim-piambahambana no nilazany hoe:

Mitakosin-drahomainty izato lanitra eny ambony
Niha nanonja vetivety ny ranomasina izay tony
Fa ny fitiavako anao safononoka hatrany
Na dia tsy tsinjoko endrika any an-tany lavitra any

Niha nalazo vetivety iretsy vony an-jaridaina
Toa nanjary haizim-pito misandratr’andro vao maraina
Ny foko anefa sahy miredy ary tsy miambakavaka
Fa ny fitia izay nodradrainy dia ianao no tompon-daka

Niha iva feo miandalana ny vazom-borona eny an’ala
Ny danik’andro mahamay nosoparan’ny fanala
Fa ny toko omeko anao dia ny ho mandra-maty
Ka soraty ho tadidy sy ho latsa-paka anaty

... ny setrasetranao ry tany tsy hamoizako ny tiako
Na ny ngidy na tomany hiaretako hiafiako
Izahay voasara-toerana tsy maninona fa tantiko
Fa raha sambatra izy any dia mba faly ny ato anatiko

Fenohery (02/06/2006 13:31:29)

Sao dia tsy mety loatra rise ny miforitra anaty ah? Ary moa mba efa nosaininao koa ny embona mandazo ny fitiavany! Raha nalaiko fanahy izy mba hilaza izay ao am-pony, dia tsy amim-piambahambana no nilazany hoe:

Mitakosin-drahomainty izato lanitra eny ambony
Niha nanonja vetivety ny ranomasina izay tony
Fa ny fitiavako anao safononoka hatrany
Na dia tsy tsinjoko endrika any an-tany lavitra any

Niha nalazo vetivety iretsy vony an-jaridaina
Toa nanjary haizim-pito misandratr’andro vao maraina
Ny foko anefa sahy miredy ary tsy miambakavaka
Fa ny fitia izay nodradrainy dia ianao no tompon-daka

Niha iva feo miandalana ny vazom-borona eny an’ala
Ny danik’andro mahamay nosoparan’ny fanala
Fa ny toko omeko anao dia ny ho mandra-maty
Ka soraty ho tadidy sy ho latsa-paka anaty

... ny setrasetranao ry tany tsy hamoizako ny tiako
Na ny ngidy na tomany hiaretako hiafiako
Izahay voasara-toerana tsy maninona fa tantiko
Fa raha sambatra izy any dia mba faly ny ato anatiko

fiaritiana (06/06/2006 20:38:26)

tsara be ny tononkalonao sady tena milaza ny tena zava misy!!
tohizo fa tsara

ANARIM (07/06/2006 08:15:10)

Fenohery : faly b aho namaky ireo soratrao ireo! Misaotra.
Fiaritiana : ary ianao mazoto mamaky ny asa soratro an, misaotra betsaka e!

tizia (05/10/2006 16:13:20)

loin des yeux zany proche du coeur tena marina izany tohizo fa tsy ho ela ny boky rah zao foana

ANARIM (06/10/2006 06:57:12)

tizia : misaotra fa le izy koa tsy hamoaka boky fa mba miainga fotsiny ndraindray!