NY FARAN'NY HERINANDRO (AORN)

Ny faran'ny herinandro raha toa ka sitrakao
Dia hatokano kely ho an'ny zanakao
Izaho mahay mandefitra, tsy hisisika aminao
satria natositosika, soloina vady vao

Fa ireo ankizy ireo, mba te hahita anao
Ka farafaharatsiny tsy atao ankilabao
Tsy fidiny azy ireo, lay fandehananao
Nisitaka ny akany, fa mbola hilalao

Dia tadidio hatrany, fa zanakao ireo
Ka aza atao tsirambina satria hoe mankaleo
Ny anao raharaha tadiavina, zakao re izay miseho e!
tsinjovy ireto ankizy, zay misy aloha ekeo

Ny faran'ny herinandro raha toa ka vitanao
Dia hatokano kely ho an'ny zanakao
izaho tsy mankahala izay mety ho vadinao
fa ireto aloha no adidy, efaina ka zakao

AORN
18 SEPTAMBRA 2022
--------