You are here: home > Vetso

Do not disturb - DotMG

Azo vakiana?

Akory izato hakanton'izatsy zazavavy
Mianoka hasambarana ambonin'itsy sambo
Toa tsy mba ren'ny sofiny ny tabataban'ady,
Na mety ho fahoriana, ny loza sy ny atambo ...

Topan-dranomasina sy siokam-boronkely
Mibitsika hampitony no tonga am-poto-tsofiny
Rivo-mahavelona, toa fofonain'anjely
Misafo ny takolany, ka lasa nofinofiny.

Ny volony olioly navelany hisaritaka
Maneva azy aok'izany, My God, qu'elle est belle
Gasy tena manja io fa tsy mba misy fitaka
Tsy feno maquillage fa tena naturelle.

Mijery izato masony sa miesona matory?
Tsy haiko fa afenin'ny solomaso mainty.
Na mihiratra aza anefa, angaha hahita akory
Ity masoko mandranoka, mandinika tsy miato.

Jereo 'nge ity hamandin'ny sandry sy ny feny
Izay tsy hitsiriritra no ho meloka hanan-tsiny
Refeso anie fa lafatra ny halava sy ny habeny
Izao bikan-dranjo izao, no ranjom-birijiny.

Nirin'ny fanahiko, ny handeha hifanatsafa
Handre ny feony manga, hihaino izay tantarany
Hitondra vazivazy, hiresaka sy hitafa
Hilaza izay momba ahy, hamantatra ny anarany.

Kanefa dia noferako ny tongotro tsy hanatona
Ny hisalovana azy mantsy andrao dia fahotana,
Nataoko an-tery mihitsy ny vavako hikatona
Ny hanaitra izato nofiny, sao fandikan-dalàna.

Fa mendrika azy loatra, mendrika ny hatsarany
Ny higoka am-pilaminana izay mety ho fahasambarany.

Hametraka hevitra

Midira aloha