valiha - HASINIONY

Azo vakiana?

             VALIHA

Lasan-davitra ny saiko indray harivan-dohataona
Raha nikatsakatsa irery teny an-tobin'ny fahiny
Tsaroako mamiko indray tian'ny foko toa misaona
Ny mihaino feom-baliha amin'ny andro tolak'iny

Hafaliana re ny ahy nony ampitson'iny ihany
Raha nahita volotara teny an-tsisin-drenirano
Io no nentiko nalaky ka nifofotra aoka izany
Itony tenako tontolo nanamboatra tao an-trano

Herinandro dia tontosa ilay valiha nolalaiko
Ka napetrako talaky mba ho hitan'ny vahoaka
Kanjo nony notendrena zary ketraka ny saiko
Feo malemy mitsipozy no mba henoko nivoaka

Hay adinoko eny mantsy ka nataoko teo no ho eo
Ny nanisy triatra kely tamim-batam-bolotara
Io no ratra sarobidy hirika mpamoaka feo
Mahatonga ny valiha hikarantsana sy tsara

Ny poety koa ry lahy dia karazana valiha
Ka ilainy lalandava irony ratra tsy mitony
Irony kalony milanto tsy mba maro mpankafy
Raha tsy heno sy tsaroany fa efa tresaka ny fony !

Hevitra mandeha

marozevo (19/04/2006 19:41:42)

Tsy asiana ady hevitra fa marina tanteraka izay voalaza.

Simpona (18/05/2006 13:53:43)

Ao aminao ilay talenta

pissoa (30/06/2006 16:37:07)

Omeko isa dimy.

hasiniony (01/07/2006 09:24:41)

Kitapo foana latsaka eny amoron-dalana ireny; fa izay mahita azy ka mandray azy no mameno azy ho erany!
Ary raisiko ho hery lehibe ho ahy ny fahatsapako noho ny nataonareo fa tsy mitory teny anefitra tsiakory ny tena!

Mysento (19/08/2009 13:49:33)

Tena lafatra,asio hafa e.

MAHEFALISON (30/03/2010 09:38:40)

... am-po mieritra, mahereza dia aza mitsahatra

Hametraka hevitra

Midira aloha

Mombamomba

Mpanoratra : HASINIONY

Nampiditra : hasiniony
Daty : 19/04/2006
Mpamangy : 3369
Mankafy : 4

Tononkalo hafa

...?
LALA AH! ETSY ANGE HO TANTARAIKO ZAVATRA...
Tsy tsiny hono...!
ny fitiavana ?
Fo vahy
Harodako
ny lasa...
Tenin'ny hafa
Tolona
Poety