RY FASANA (Heriarilala )

RY FASANA

Nangalarinao ny havako tiako sy ny namako tsy foiko
Nentinao ankeriny, tsy nierana akory, nalaina an-tsokosoko
Kanefa mbola maminy sy sarobidy taminy ny fihavananay
Ary rah any sitrapony dia ora toy izao, miaraka eto izahay !

Dia tapitra ny nofy sy vinavina rehetra niarahanay nikasa
Ny fianakaviana no miara-manetsetra mahatsiaro irony lasa
Misaraka aman’aina no zava-mafy indrindra nefa tsy maintsy ekena
Sahy ratsy ianao ry fasana mpisompatra ny velona, mpandrava ny harena.

Dia maminao ry fasana ny mandraraka tomany olo-maro be
Ny mponina rehetra tamana eto an-tany no nindaosinao nandeha
Nahoana anefa ianao no tsy mety mionona ary tsy mety ho leo
Fa satrinao hatrany hampisentosento, hamelona toreo.

Ny tsy ampoizinao ry fasana dia any am-parany any haloanao ny maty
Hihaona ny mpihavana, ho faly fa tafarala, ianao no tsy hahatanty
Fa hilaozan’ireo voavonjy ka hahonena, eny, tena hangaina
Ireo mpandresy hihoby, hiroso hiaka-dapa, fa efa avotra aina.

Heriarilala Andriamamonjy, in Tapikan’ny Fanahiko, tak 4-5
--------