Iza ianao... (Herilanja RANDRIAMANGA)

Iza ianao ry ‘lay mazava
Zay miposaka atsinanana
Ka manjelatra tsy tantiko?

Iza ianao ry ‘lay mafana
Te-hanova ny fisainana
Ka manaitra ny ao anatiko?

Iza ianao ry rahoviana
No hahalalako ny tena marina
Ka hanavaozako ny fiainana?

Iza ianao ry any aoriana
Zay tiako hofantarina
Nefa tsy azoko hihoarana?

Iza ianao ry fanahiko
Zay mitady tsy ho tamana
Fa te-hahita ny mangirana?

Aiza ianao ry Jesoa Tompoko
Zay mpamela fahotana
Ampio aho re fa sahirana ?
--------