Ry vadiko. (Herilanja RANDRIAMANGA)

Ry vadiko,
Atao ahoana aky ity fiainantsika roa,
Fa zary mankahia sy mahavaky loha ?
Mahalasa saina ahy foana hoe atao ahoana ary,
Fa zary mankanoana no mbola mankarary ?

Ry vadiko,
Atao ahoana ka mba hampetipety azy,
Fa voninkazo iray no mba anaty vazy?
Tsisy ny harotsaka ary tsy misy ny hataina,
Lany izay nangotraka nefa tsisy azo hantenaina.

Ry vadiko,
Oviana vao horitra izany ranomaso,
Fa zary mangatsiaka ity tokatranomaso?
Ny ngidin’ny tomany toa tsy mety vita,
Ilay omaly sy ny androany nefa niarahana nahita.

Ry vadiko,
Oviana vao hotapitra ito fahatrana,
Fa efa ela aho no niharitra fa toa nihanahana
Tsisy fiovana na dia niezaka ny tena,
Fa lavitra ny Tanana no misy ilay harena.

Ry vadiko,
Angamba any ho any no misy ilay andrasana
Fa efa lany mamy ilay teto am-pelatanana;
Any nefa aiza fa mahavaky loha,
Fa reraka aho mitaiza ireto zanantsika roa.
--------