Asaramanitra (Ivetso)

Nantsain'i
(Nalaina tao amin'ny vetso.serasera.org)
Arahaba tonga soa ianao ry Asaramanitra !
Faly mandray Anao ny rehetra, ambany lanitra.
Mbola mifono misitery nefa maharavo fo,
Mandrosoa ery aloha fa raisinay an-tanan-droa.

Tamin'ny mamatonalina no niandrasanay anao,
Mova tsy ny miandry vohoka, fahaterahana vaovao.
Tsindrian-daona ny rehetra. Olo-maro sesehena
No efa vonona hitsena sady miandry, manantena.

Arahaba tonga soa ianao ry Asaramanitra !
Avy aiza ka ho aiza ? Ny dianao dia tsy hita faritra.
Ny kely hany fantatray dia eto aloha ianao izao.
Tonga hiara-dàlana aminay, ô ry Taona vaovao !

Tamin'ny mamatonalina no niandrasanay anao.
Mitondra inona ianao ? hoy ny vetso anaty ao,
Fa miandra fahavelomana izao àry rehetra izao.
Moa ho taom-panambinana amin'izay rehetra atao ?

Irina indrindra ianao ry taona ho taon-jina,
Ho taom-pahasoavana, ka tsy hisy ho diso fitahiana,
Hanjaka ny fifankatiavana sy ny fanahim-pirahalahiana
Ka hifanohantohan-tsy ho lavo eto an-tany fivahiniana.

Fotoana voafetra ihany no ahazoantsika miaraka,
Koa ny firariana hatrany no ataonay variraraka.
Arahaba tonga soa ianao re ry Asaramanitra !
Enga ho taom-pifaliana sy hamerovero hanitra !

Ivetso
--------
Rohy:
Sokajy : Fifaliana
2683 0
Hametraka hevitra
Midira aloha
Momba ny tononkalo
Mpanoratra : Ivetso
Nampiditra : Vetso
Daty : 05/01/2004 02:11
Antsantononkalo
Nantsain'i
© Eugene Heriniaina - serasera.org 1999 - 2023 - page load 0.0171