MANANA FAHARETANA (LAVENONA)

MANANA FAHARETANA

Raha sendra ka mafonja
ny entana zakaina
Mahery sy manonja
ka mankarary ny aina
Dia teny kely monja
no azoko lazaina...
Manàna faharetana !

Raha toa ka mankadiry
ny ady izay lalovana
ka rakotra hirifiry
sy tena mahatorovana
Dia tiako ianao hikiry
ity teny ity tsarovana
Manàna faharetana !

Raha nanadrana in-tsivy
tsy namokatra daholo
dia aza mbola kivy
fa mety ny fahafolo
no handraraka ny ivin'
ny voahary manontolo
Raha manam-paharetana !

LAVENONA
03/08/23
--------