MIANGALY (Niry-Solosoa)
Mbola tsisy niantsa
(Nalaina tao amin'ny vetso.serasera.org)
MIANGALYNy hoditra malamany mainty ngalingaly;
Ny tsikiny malefaka toa kristaly;
Fotsy sy botsiaka ny lahatry ny nify;
Ny randrandrandram-bolony,madinika,manify;
Ny maso baibari sariaka mahamanina
manintona mpijery, rendrika sy fanina;
Ny fijorom-batany toa fototra rofia
Vorivory nofo bikàna tsy mahia!
Ny tovovavy gasy? -Miangaly angola vaitra
rehefa "fampitaha" ka zovy no tsy taitra?
Ny tena viavy gasy? -raha toa tsy fantatrao
ambarako aminao tsy ho azo ho kilalalao :
Manda tsara hidy ny ao am-bavahadiny,
Ny afaka mankao?...iay hany tena vadiny!
Izao anefa indrisy, toa voaviravira
rehefa notambazana...vola sy safira!
NIRY-SOLOSOA
(07.12.02)
in "TEPON'ONJA" (Febroary 2005)
--------
Rohy: