ANKAMANTATRA (Njakahery ANDRIAMALALA)

Rindrim-by tsy azo ihoarana,
Tsy takamaso ho tazanina,
Ny ambadik'io havoana io,
Mety ho oram-pahavaratra

Ny ao tsy hay hoe mazava,
Na koa maizina mikitroka,
Sa angamba fenomanana ?
Nefa mety koa ho rahona

E! Toa visavisa ihany,
No isainana anizany,
Ny dia ity miroso hatrany,
Fa iny lalana iny mantsy....

Iriko mafy ny ho tody,
Any ambadikin'ny tsy tazako,
Any aho no hamisavisa,
Any aho no hitanisa,
Izany ritsokin'ny fiainako

Ty setrok'afo mihalohalo,
Manakona iny lalako iny,
Tsy zakanao r'izato masoko,
E! Mirotsaka tomany

Tomany tebiteby ve?
Sa alahelo sy toloko ?
Moa ve ratra any anaty ?
Sa ahoana re ry foko ?

Ny lasa mantsy dia baraingo,
Ny ho avy ankamantatra,
Ny dia izao mankany hatrany,
Tsy fantatra hoe hiampita aiza

Fa izay ho any ampitsoko any,
Moa ve mbola ho tomany ?
Fa ahoana loatra re ry tany ?
Ny tena mantsy nofo ihany

Soa ny aina fa voafetra
Dia hatraiza ny fanantenana ?
Angamba....., Ambadikin'ny tsy tazana any,
No voasoritra ho izany

Ny ampitso tsy azonao soritana,
Iny lalana iny miolakolaka,
E, izany ka tena ankamantatra,
Maizina amiko ô ry tany

Njakahery ANDRIAMALALA
(04 Septembre 2023)
--------