VETSOVETSO (Noëlson L. ANDRIANIAINA)

Vetsovetson'ny manina
No nahatsaroako azy indray
Feo mangina amin'ny alina
No nalefako taminy indray
.
Vetsovetso samy irery
No nitanisako ny lasanay
Toa lasa ny fijery
Hibanjina ny hoavy indray
.
Vetsovetso tao am-poko
No naveriko eto indray
Fa izaho tsy mba hiova loko
Fa tena matotra hatrizay
.
Vetsovetso mangingina
Toa sarotra hovinaniana
Mahagaga, mahaliana
Ny antom-pisiana
.
Vetsovetso, lasalasa
Ny antony nahatafaray
Raha jerena ny lasa
Tsy hita hatramin'izay
--------