TAOTAON-KAFA (Riantsoa)

Mbola tsisy niantsa

Hangataka antsa
(Nalaina tao amin'ny vetso.serasera.org)
Manao tohivakana maneho ny hatanorany
Ny eritro manjeny;
Anefa, ny tontolo notadiaviny any
Zakain’ny heniheny.
Ny hanin’olon-tiana manao amboletra,
Voafefin’ny havoana;
Ako hiakam-po mitraho an-kerisetra,
Tamberina eto foana;
Atopan’ny alom-betso handrongatra ny morona,
Tsy nisy tsy nafoy,
Tsy nisy nandrombinana , tonga tsara horona
Manao tampody fohy.
Tsikaritry ny saona mipitra anjorom-bala
Anefa ny handefitra
Toa mihantsy alahelo handrovitra ny ala
Hipaoka ho any an’efitra
Ny efitra aza sina, moana tsy mamaly
Tsy andrenesam-peo
Sondriana mitadidy ny rediko omaly
Fony aho nandalo teo
Mamoy fanantenana nasolo antsojay
No sisa herin-tsaina
Iantsoana faraonona hamerina indray
Ny nofy niangolaina



RIANTSOA
--------
Rohy:
1693 1
Hevitra mandeha
hery ( 01/11/2010 05:33)
Lasa saina aho izany mamaky ity tononkalo ity hoe inona no nahatonga ilay lohateny hoe Taotaon-kafa?
Ilay Taotaonkafa (teny mitambatra) aloha dia vorona ary inoako fa noho ilay feony toa manao hoe "taotaonkafa" no nahazoany ny anarany.

Rehefa nahita ilay teny misaraka sy ilay votoatin'ilay tononkalo nefa aho dia toa tsy ilay resa-borona ilay izy. Taotaon-kafa. Nataon'ny hafa? Vokatry ny nataon'ny hafa? Iza no nandao? satria toa misy koa nefa hoe "fony aho nandalo teo".

Lalina be...

Misaotra hatrany.
rainstorm ( 01/11/2010 07:16)
Fanahy iniako mihitsy ny nanasaraka ny taotaon-kafa satria misy ifandraisany amin'nilay vorona tokoa
Ny taotaonkafa dia vorona mpiantso ny orana ho avy izy io, raha tsy diso aho, araka ny fitantaran'ny olona azy. Maneno tsy mijanona fa eo foana. Misy ifandraisany amin'io toetran'io vorona io ny tian'ny mpanoratra hampitaina : olona iray manina, malahelo, lavitr'olon-tiana.... voasakan'ny havoana. Toa tsy misy tonga any amin'ilay olon-tiana ny vetsovetso fa manakoako fotsiny......[....]
Misaotra anao mandalina hatrany
kiriah ( 01/11/2010 14:53)
tsara zany tononkalo zany ! tonga dia hita avy hatrany fa manan-karena voambolana ary mahafehy tsara ny haisoratra sy haiteny malagasy ilay olona nanaoratra azy, isaorana indrindra e! ary ho ho ela velona anie ny poety malagasy
Hametraka hevitra
Midira aloha
© Eugene Heriniaina - serasera.org 1999 - 2024 - page load 0.0101