Manaiky aho (Ny Hafatra RANDRIANTIANA)

Manaiky aho

Ekeko ny hoy eritreritro,
Fa noho izaho no mampanjombona anao toy izao;
Tsy ho laviko raha ho tanisainao eto,
Eny na izao sy izao.

Manaiky aho,fa noho ny fisiako,
No antom-pahanginanao lalina,
Eny efa notadidiako,
Ireny teny izay natentina sy navarina

Manaiky aho sakaiza a,
Na aza tsy andray anjara amin'ny tantaranao;
Tsy hoe,ho aiza aho na hakaiza,
Fa hiafy tsotr'izao.

Fantatro fa izaho ilay raho-mainty,
Mpanembana ny hasambaran'ny tany.
Ka izao dia izao tsy maintsy,
Handao sy hisintaka ho any lavitra any.

Tena tsapako marina,
Fa noho ny fisiako sy ny fisiako,
No antom-pahanginanao lalina,
Sy izao risoriso.

Eny,manaiky aho raha izay no hifandaharana,
Voatohitro na ny herin'inona sy iza,
Raha izay no halahatra sy havarina,
Nefa,hitandremako ny amin'ny sisa.

Ny Hafatra Randriantiana, 03 Septembra 2021
--------