Ranomason'iza (Ny Hafatra RANDRIANTIANA)

Ranomason'iza

Ranomaso nifangaro rà
No nijohy nanarak'iny vatolampy iorenan'ny mandà fihantana
Lobolobo feno tombokavatsa
Mameno ireo toerana fitarainana

Niontana ny fon'ny sisam-pahafatesana
Niforitra ireo bekotro maro holatra
Reraka misaina izato fanjanahana an-kolaka feno hafetsena
Ataon'ireo vonton'ny solaitra.

Etsy ny tanindrazana nandrandraina
Vinarotry ny tia kely etsy an-joron'ny tranon-drazana
Ny fo mitaraina
Darohana baomba mandatsa-dranomaso, misy hiravanana.

Ranomason'iza indray no andrasana hiraraka
Hanadiovana izato fahalotoana manempotra an'ny Madagasikara
Nisy ny efa nitomany, niady mba ho afaka
Nisy koa niaina tao anaty famadihana tanindrazana

Ry tanindrazanay malala ô!
Ranomason'iza no mbola tsy ritra
Tsy mahatsiaro izato fijaliana afo mandoro
Mangina anoloan'ireo tsy rariny tsy tambo isa

Ranomason'iza no nanafaka
Dia ranomason'iza no mbola andrasana hanavotra ny tany efa reraky ny fahoriana tsindrian'azo lena
Tarehy bobongolo no entina hilahatra etsy anoloan'ny " Madagasikara tanindrazanay malala"
Lavitra anay ny famonjena.

Ny Hafatra RANDRIANTIANA
--------