Tsy manan-kialofana (Ny Kanto)

Sezan-jaridaina vita hazo, mamanala
Io no antenaina, hanofisana malala

Eo an-kalamanjana eo no fatoriana
Sy nataony mazàna fiaingan’ny ny faniriana

Sezan-jaridaina itangoronam-boron-kely
Mpamoha isa-maraina sy mpamerin-tsiky very

Eo no itazanana ireo mpandalo marobe
Manenjika ny fiainana, tsy sasatra mandeha

Eo izy no mihira ireo kalon’ny fahiny
Izay mamiravira ny fony ankehitriny

Nihafihany teo daholo, na oran-dohataona
Na fanala manangoly sy alina misaona

Nifaliany teo tokoa ireo vonimanitra nilatsaka
Tamin’ny alin-diavolana, fotsy sy mangatsakatsaka

Sezan-jaridaina hany mba fananana
Eo no ialan’ny aina efa ambivitra sy ana

An-tsezan-jaridaina teo izy no natory
Tsy mba nitaraina ary tsy nifoha intsony.

Ny Kanto, janoary 2005. Ilay tsy manan-kialofana.
--------