Zara-hetran'ny olo-miaina (Ny Kanto)

Any lavitra any...

Ny rojom-pifalian’ilay
Mpianakavy kely iray
No rava sy niraraka,
Kofehy mando* no tinapaka.

Rofin’ny fiainana,
Zara-hetran’ny olo-miaina
Sy mampitondra ny taraina
Ny fahafatesana.

Mampipetraka torovana,
Ka tsy te-handroso intsony,
Lohasaha tsy mampitony,
No voatery ho lalovana.

Fa na maizin-kitroka ny jaly
Dia misy vaovao, mahafaly
Hampitsahatra tomany.

Tsy ho faty, hanafàna
Ny toky sy fanantenana :
Mbola hihaona, any an-koatra any.

Ny Kanto. Pont au change. Desambra 2004.

Kofehy mando : andry.
--------