MAMELA AHY VETIVETY, (RAMANATANTARA)

(Nalaina tao amin'ny vetso.serasera.org)
MAMELA AHY VETIVETY,
Avelao aho ho zaza…
"Lasana tsy hiverina intsony."
Mbola tsy eken’ny eritreritro
Ny tsy hahita anao intsony !
Jereko, hifoha ve ianao ?
-Tsia, efa lasa toeran-kafa !

***

Banjiniko ny tavanao :
Tsiky mbola imolotrao,
Hodi-tavanao malama,
Ianao niova lasa anjely
Hitsena ny mpahariny...

***

Nisy niova tato anatiko,
Tsy aiko ambara inona.
Tsapako toy nihofaka
Lasana ny hantahanta,
Lehibe tampoka aho !

***

Ry foko o, mba avelao
Aoka ny fitiavan-tena,
Misy bitika noho ianao
Nilaozan'ny malalany !

***

Mamelà ahy vetivety,
Avelao aho ho zaza
Hidradradradra hoe:
"Mama, Mamako !
Tsy ho hitako intsony !"
Izany kiako mangina
Asandratro am-bavaka
Arahin-tsento tomany !

***

Hoy ny zafikelinao iray :
"Soava dia ry nenibe,
Arabao ho ahy Andriamanitra any !"
Mamelà ahy vetivety,
Avelao aho mbola ho zaza
Mba hiombon-kafatra aminy !

RAMANATANTARA, Antananarivo, 20/09/07
--------
Rohy: https://vetso.serasera.org/tonokalo/ramanatantara/mamela-ahy-vetivety
Sokajy : Fahafatesana
1413 1
Hametraka hevitra
Midira aloha
Momba ny tononkalo
Mpanoratra : RAMANATANTARA
Nampiditra : ramatoabe
Daty : 14/11/2007 14:14
Antsantononkalo

Mbola tsisy niantsa

Hangataka antsa
© Eugene Heriniaina - serasera.org 1999 - 2023 - page load 0.1546