Tsingerintaonako (RANDRIANARIMANANA Jean-Jacques )

Tsingerintaonako

Andro sarobidy, miavaka
Ka indro atomboko ami(n'ny) vavaka,
Tonga taona aho mantsy androany,
Ka faly, mirana aok'izany:

Deraiko Ianao ry Ray Tsitoha,
Nivimbina ahy, namafy soa;
Fa tombon'andro avy aminao,
Izao tanteraka anio izao.

Raha itodihako ny lasa,
Dia tsapa ho kely izay kinasa;
Raha ny ho avy no iasan-tsaina,
Toa valalanina ny aina.

Ka ny androany no ifantohako,
Izay no zakan'ity lohako;
Ny anio no ananako fanilo,
Hanazava ahy sy hitsilo.

Tsingerintaona sadasada,
Iheveran-tena ho tena dada;
Nefa mihoatra am(in)'ireo zoky,
Toa zaza mbola mila toky.

Fa taona vao manasa-dalana,
Ikatsaham-piadanana,
Ho an'ny taranaka amam-para,
Vao fiantombohan'ny tantara.

Tsy adino koa 'reo ray sy reny,
Sy ny adidy am(in') izy ireny;
'Zao no ahatsapana ny ady nianany,
Fa vita tsy mba nitarainany.

Ho an'ny sasany hoe "krizy",
No atahorana izaitsizy;
Tsy ahoako raha izay ny anao,
Fa raha ny ahy dia toy izao:

Taonan'ny fahafenoana,
Mana-tantara ara-pinoana,
Fiomanana amin'ny Fandresena,
Fanangonam-pahendrena.

Amen!
JJR. Cherbourg, 17/10/2025, 04:40
--------