HOTELY HAFA KELY (RASOA)

Mbola tsisy niantsa

Hangataka antsa
(Nalaina tao amin'ny vetso.serasera.org)
Nahatsiaro noana tampoka
Dia niditra hotely
Nivoaka avy tao, voky ampoka
Ny sakafony hafa kely

Narosony ny " fiantrana"
Io tonga dia nohaniko
Omeko ny kilemaina sy ny jamba
Ireo natokako tsy laniko

"Fahaizana misaotra"
No nataoko solon-drony
Io no lasa laoka
Ny hanohanako nitony

Nisy koa ny "fahasoavana"
Nataoko nitafotafo ny lovia
Hitondrako ireo havana
Na hasaiko ho tonga aty

Be Dia be ny "zava- tsoa"
Azo hatao be fandraoka
Tena hanim-pito loha
Ianao indray no mety hiaoka

"Fahendrena" sy "fahasambarana"
No nogohiko ho solon- drano
Notohaina aho fa tsy tana
Tsy nijanona raha tsy mamo

Saika handramako ny "fahatezerana"
Satria narosony mafana
Ny hatendako no noferana
Sao hitondra adalana

Nanentoento ny "fialonana"
"Fitiavantena", "famitahana"
Nefa toa sakafo hampiolana
Dia nohezahiko tsy hohanina

Nofaranako tamin ' ny kafe
Notapohiko "teny mamy"
Dia nataoko be dia be
Hozaraiko any ho any

Entiko mody ho an ilay vady
"Fitiavana" matsiro
Isan'andro izy mitady
Izaho indraindray no manadino

Nofonosiko taratasy
"Tambitamby" sy "fianarana"
Ireto ankizy tsy hangasihasy
Ho voky hiatrika fiainana

Nataony tsindrin-tsakafo
"Famindrampo" sy "fandeferana"
Nefa nijery fotsiny ireto maso
@ manaraka aho miverina

Raha hikarakara fanasana
Ity hotely ity no finidy
Ny sakafo tena tsara
Sady tena sarobidy.

RASOA
Novambra 2012
--------
Rohy:
Sokajy : Fiaraha-monina
226 0
Hametraka hevitra
Midira aloha
Momba ny tononkalo
Mpanoratra : RASOA
Nampiditra : RASOA16
Daty : 01/06/2023 17:28
Antsantononkalo

Mbola tsisy niantsa

Hangataka antsa Hampiditra feo
© Eugene Heriniaina - serasera.org 1999 - 2024 - page load 0.0141