You are here: home > Vetso

NY TENA SAKAIZA - RATSIMBA Georges

Azo vakiana?

    Tsy olo-natolotry ny Zanahary
    Tahaka ny havana : ray aman-dreny
     Sy mpiray tampo
     Ka tsy maintsy tiana
     Na tiana na tsia
    Fa olona sendra nihaona tsy nahy
    Tanivon’ny sehatra iray niombonana
    Na tafara-dia tan-dala-niraisana

     Dia nifanatsafa
     Nifampitantara
     Dia nifanazava
     Nifanopi-maso,
     Nifamihin-tanana…
     Dia nifankahazo
    Tsy nifanadino na dia tafasaraka !

    Tsy misy dina nasiana sonia
    Na velirano sy vavolombelona
     Kanefa ao anaty,
     Dia sary tsy maty
     Sy akon’ny feo
    Tsy mety voakosoka, tsy mety hadino
     Na aiza na aiza
    Satria feo sy sarin’ny tena sakaiza!

     Ny tena sakaiza
    Olom-pinidy tanatin’ny maro
     Tsy anjato, tsy anarivo
     Fa antapitrisa
    Tsy mba notambazana na noterena,
    Misaina isan’andro, isan’alina koa
     ‘Zay mety hahasoa,

    Manondrotra laza ary koa voninahitra
    Manaiky ho andry na ho vodifahitra!
    Sy vonon-kanampy mba hahatafita
    Miara-dravo amin’izay asa vita
     Ny tena sakaiza!

    Sasakalina latsaka dimy, 15 jolay 1996

Hametraka hevitra

Midira aloha