Vokany (Herizo Ravonjison Andrianitsiahy)

Ny hira fikaloko amin'ny andro ririnina,
No nandoaka ny foko ato anaty.
Ka nahatonga fery tsy mety afenina.
Sy aretina saika nahafaty.
.
Ny sioka fanaoko amin'ny andro lohan-taona,
No nanindrona ny saiko hitadidy,
Ka nahatonga ahy hanembona,
Ireo fotoana sy ny ora masi-mandidy.
.
Ny vaki-bokiko tamin'ny andro fahavaratra,
No nampahatsiahy ahy tantara matory.
Ka nahatonga ny saiko hisaina fa lahatra,
Ny nitiavako anao ilay tsy fantatro akory.
.
Ny fijeriko ny androko lasa,
No mety manjavona tsy azoko vinany.
Ka mahatonga ny saiko mandatsa,
Ny sary fikirin'ny foko mitomany.
.
Ny firedaredan'ny afo tanihiko,
No mampagididy ny ranjo izay efa valaky ny dia.
Toy izany koa ny foko,
Mangididin'ny fitia.
.
Ny firotoroton'ny fiainako tsy haiko hoe ho aiza,
No hiandrandraiko ilay diavola-mazava any ho any,
Izy irery no antenaiko hampisava.
Ny aizina manaloka ety an-tany.
.
Indrisy mantsy fa onjokonjoko izaho samy irery.
Ny misedra ity lalam-piakarako.
Mandeha tokana tsy misy mpijery.
Ka miantso anao ho namako.

.
ⓒ Herizo Andrianitsiahy
--------