Vovoka (Herizo Ravonjison Andrianitsiahy)

Vovoka

Vovoka ihany aho ka ho vovoka
No hifindrako makany any amin'ny tonta
Rehefa drodrahin'ny ady sy sovoka
Mandemy ny tena sy manontanonta

Vovo-madinika mora bataina
Sy zakan'ny rivotra malemy fitsoka
Tsy ren'ny nofo sy tsy azo tsapaina
Fa manelina ihany rehefa manditsoka

Vovoka nisy sy tsy manan-tsafidy
Misedra ny fiainana tsy misy fitserana
Mahitahita ny mamy sy ngidy
Rehefa tsofina mafy mba hifindra toerana

Vovoka ihany ka tsy mba maharitra
Na dia fetaina ho fotaka hijoro
Kanefa ny fotoana tsy maintsy ho ritra
Na ho ela na ho haingana tsy maintsy hikoro
Mba ho isan'izay efa ringitra
Didinina vato sy fefin-jozoro
Ho vovoka kely tsy afaka handringitra
Rehefa voa mafimafy sy voatorotoro

Herizo RAVONJISON ANDRIANITSIAHY
--------