AFO SY VANJA... (Rolly Casimir)

AFO SY VANJA....

Asa raha fantatrao fa...
Tamin'ireo minitra nibanjinanao ny masoko
Dia nisy pitik'afo nirehitra tsy tantiko
Nandoro ahy mangingina tanaty foko tany
Nandravarava ny amiko ilay topi-maso mamy
Nantefanao "tsy miala"
....
Ny fo koa moa adala ka...
Bitika toy izany dia mety haharendrika azy
Diso ve aho raha nitia anao sahady?
Ekeko izay ho vokany fa tsy maninona avy e!
Na ny fahatanorako aza no hanefako sazy
Ao amponjan'ny fonao
....
Fa iza loatra ianao no...
Nandavo ny mahery tamin'ny topi-maso monja?
Nahoana ianao no niavaka tamin'ireo sahondra
Sy voninkazo dia nolaviko hatrizay?
Bedesiko matetika ny foko indraindray
Mba tsy hirona any aminao
.....
Kanefa hatramin'izao dia...
Ny tsikinao hatrany no miverina ato an'eritro
Omaly aza moa efa tapaka ny hevitro
Fa haborako aminao ny tsiambaratelom-poko
Heloko ary ve raha olo-manan-tompo
No iriako mba ho tiavina?
....
Kanefa raha ny marina...
Ianao no tompon'antoka amin'izao tantara izao
Ny toraka malefaky ny topi-masonao
No afo nampirehitra ny vanja tato am-poko
Niparitaka izy izao ka angamba tsy hadisoako
Raha ianao no nipitihany


√Rolly Casimir

"Ny tena soldat, maty izay vao resy"
--------