INY FASANA INY... (Rolly Casimir)

...
Aina firifiry no efa norombahiny
Mpifankatia firy no efa nosarahiny
Raha mbola tao anatin'ny volana tanteliny
Nofo firifiry no raraka nateliny
tanatin'ny hirifiry
....
Dia...oviana sa impiry
No nanam-pangorahana iny fasana iny?
Zaza rano firy na hoe tsy manan-tsiny
No voaantso tany am-bohoka hisedra rangolahy?
Olon-kendry firy no nilofika tsy nahy
tan-dalam-pahendreny?
....
Nefa...firy tamin'ireny
No efa mba naveriny sy nananany indra-fo?
Firy tamin'ireny no tsy efa matoatoa
Vao nalefany hampitahotra ny alina tontolo?
Dia firy tamin'ireny no tsy nanjary lolo
Mpanaitra n'y matory?
....
Sakaiza firy akory
No nanonofy ratsy tanaty sasak'alina
Dia...firy tamintsika nilaza ho tena malina
No mba tafandry mandry raha sendra noseranany?
Hafaliana firy no tsy efa nosembanany
sento mankadiry?
...
Virijiny firy
No nataony an-terisetra hamarana ny fiainany
Izy ve nangoraka ny sento sy tarainan'
ny havana tomany miangavy ny hiverenany?
Nefa...taolana miranga no sisa mba navelany
tanaty lamba mena
...
Kanefa mitenena
Ry fasana any an'efitra mpitsiriritra nofo
Aiza ny sonia ary aiza ny porofo
Ahafahanao milaza fa anao ny nofonay?
Rahovina vao haverinao ireo lasana hatrizay
Any ambany dongontany?
.....
Fa mantsy hatreto ihany,
Hatreto an-tany ihany ny fanjakanareo
Tsy azonareo lovina ny saina sy ny feo
Fa hamelatra ny helany hikopaka any ankoatra
Higoka ny hamamin'ny kanto tapitr'ohatra
Ny fanahy sinara-batana

✓Rolly Casimir✓

"Ny tena soldat, maty izay vao resy"
--------