MINITRA VITSY FARANY (Rolly Casimir)

MINITRA VITSY FARANY......

Tsia!
Tsy hiangavy anao hiverina no tena fikasako
Tsy hiangavy anao hamafa ireo vaingan-dranomaso
Natobaky ny feriko tam-poko mangatsiaka
Tsy hiagavy anao handrafitra ireo bokin-dasantsika
Efa potika sy rava
..........
Fa fotsiny hilaza
Teny indraim-bava ho fanaovana veloma
Dia hamafa ilay fitiavana tsy maty novonoina
Saingy, potiky ny taona sy ny ela ankehitriny
Hanopy maso farany ilay mamiko fahiny
Raha mbola azo atao
........
Dia.....raha toa ka sitrakao
Mba mangataka tso-drano ilay fo vinakin-dratra
Fafazo rano farany handresy ireo akata
Amin'ny fiainan-drako-pitaka eny an-dalana ho diaviko
Dia aza manontany izay olona ho tiaviko
Na dia ny anarany aza
......
Fa mazava dia mazava
F'ianao no efa nandrava izay nisy tamintsika
Ka tsofin-drano ianao raha toa efa nahita
Sambara eny an-tratran'ilay soloko vaovao
F'ianao no nisafidy izao lalantsika izao
Ka mizora am-pahasambarana
........
Fa eto am-baravaran'
Ny lasa efa nifarana no hiaonantsika farany
Ka angamba mety hangataka ny vaingam-pahasasarany
Ireo ora lanintsika tan-dala-novakiana
Ka hody kopim-bahona ireo bitsik'hafaliana
Zinara tamin'izany
.......
F'ianao niova akany
Any an-tratran'olona any ka inoako fa tsy hanenina
Inoako fa tsy hahatsiaro ny lalana miverina
Fa handevina ny lasa hivalona any am-pasany
Fa ny hahitanao ho tretrika sy sambatra eny an-tratrany
No....tena faniriako
.......
Dia fara fiangavaiko
Ry mamiko sy tiako raha mbola azo atao a!
Tolory tsiky farany ilay babo taminao
Mba ho fara fanafody hanasitrana ny fony
Mialohan'ny hidifiany ka tsy hahita intsony
Ny salovan-tavanao

✓Rolly Casimir✓
--------