INY RENIKO INY... (Rolly Casimir)

INY RENIKO INY....

Andriamanitra ô!
Tsy hoe midongy akory aho fa mba mihantahanta kely
Tsimbinonao manokana ny fiainanay sy i Neny
Vokiso fitahiana amin'izay rehetra atao
Mba hiangaro mihitsy raha toa ka sitrakao
Fa....mitady ho kivikivy
......
Iny reniko iny!
Tsy misy an'iza hitsetra raha sendra rera-tsaina
Marary iny indraindray fa minia tsy mitaraina
Misento iny indraindray dia mandrotsaka tomany
Fa afeniny ahy daholo izany rehetra rehetra izany
Mba ho filaminan-tsaiko
....
Andriamanitra ô!
Ianao mahalala tsara fa sady Dada iny no Neny
Iny tsy nisaina hanary ahy velively
Na inona esoeso nataon'ny fiarahamonina
Iny reniko iny ilay miezaka mitolona
Mba hatafita an-janany
....
Mba tsimbinonao ny lalany,
Sazio izay rehetra mety haniratsira an'azy
Tsy mba tovolahy iny fa sandrim-behivavy
Torovana sy resy noho ny zava-nisy teto
Tsy olona tomady iny, fa vantana marefo
Ka...tantano sy vimbino
.....
Ry Andrimanitry ny mpino,
Mba omeo fiadanana ny tokantranonay
Ataovy hoe ampy izay fijalianay izay
Dia..i Neny aza avela mba hitomany intsony
Meteza manasitrana ny ratra anaty fony
Raha toa ka sitrakao!

Amen!

√Rolly Casimir
--------