Raha tsy hihira intsony (Rongo)

Raha tsy hihira intsony...

Raha tsy hihira intsony isika
iza indray no mba hikalo
ny hatsaran'ny lohataona
mbamin'ny volana baliaka
sy ny alina mimoana?

Raha tsy hihira intsony isika
iza indray no mba hitsilo
ireo tsy manan- kitarainana
mosarena an'alinkisa
izay nalavon'ny fiainana?

Raha tsy hihira intsony isika
iza ndray no hampanako
ireo tarainan'ny ambany
noverezin- jo tsy hihiaka
moana noho ny fahantrany?

Raha tsy hihira intsony isika
iza indray no hamelomaso
irony tsiaro am- para- tazana
miha rendrika tsy ho hita
nefa ain'ny tanindrazana?

Raha tsy hihira intsony isika
iza indray no ho arofanina
eny anivom- piarahamonina
anjakan'ny disadisa
sy ny sisa tsy hay tononina?

Soa fa mbola mihira isika...

©️Rongo, 2021
--------