Ho inontsika ny hira (Rongo)

Ho inontsika ny hira

Ho inontsika ny hira
raha hiraina fe hiraina,
tsy hitondra fahamboniana
ho an'ny fo fanahy sy saina;
kotrakotram- pahoriana
sy mitolona ara- nofo,
milonjehitra mangina
irony tanambokovoko?

Ho inontsika koa ny kalo,
izay kaloina sy antsaina
eny an- tsofin'ny mpandalo
amin'ny andro vao maraina,
raha ho rediredy monja
sy mandringa ny hatsarany;
tsy hahababy tsy hahatondra
na dia sombin- tsiky ihany?

Sarobidy very lanja,
vary an- daona ratsy toto;
toy ny virijiny manja
novirain'ny jiolahim-boto
ny hirahira izay hiraina,
sy ny kalo izay haranty
raha tsy hambomba fofon'aina
hahavelona ny maty!

Rongo,
--------