You are here: home > Vetso

IREO NOSARAHINA ("Les séparés") - Ryana

Azo vakiana?

IREO NOSARAHINA

Aza manoratra…

Aza manoratra akory, torotoro ny fanahiko,
Mahatsiaro ho very aho;
Zary andro mampahory ny lohataona izay itsahiko,
Ravina saraka aman-taho;

Efa nakomboko ny sandriko tsy hitady na hanandrana,
Na hanantena ny hamihina;
Ary mikoro ireo andriko, tsy misy tavela na miangana,
Rava, potika sy ringana;

Aza manoratra akory, tsy asiana teny ny amin’io,
Avelao amin’izao,
Aza manoratra akory, Ny Avo no hany anontanio
Ny amin'ny fitiavako anao;

Aza manoratra ianao, fa henoy ny fahanginana
Mampahatsiahy ilay fitia;
Ary dia ho tsapanao fa ampoka, feno, ts'isy hanombinana
Ny hasambaranao ety!

Aza manoratra...

Matahotra anie aho, manahy aho ny amin’ny tsiaroko,
Ny feonao no hany reko,
Ary ny anaranao no hany mameno ny diariko,
Hany inoako sy ekeko;

Aza miventy loharano amin’ny matin-ketaheta
Rah’izy tsy afaka hisotro;
Ny sora-tànan’olon-tiana toy ny endrika mitoetra,
Kanto, tsy mba mety mihofo;

Ary aza soratanao ireo teny mamy tsy haiko hambara
Izay noraiketinao tam-poko;
Voalazan'ireo tsikinao ny haben’ity fitia voarara,
Tsy mety mihato fa misoko…

Aza manoratra…

Ryana
(19/10/07)
Nadika avy tamin’ny “Les séparés”
Marceline DESBORDES-VALMORE – Julien CLERC




Sokajy : Fiononana, Fitiavana