REDIREDY TAKARIVA (Ryana)
(Nalaina tao amin'ny vetso.serasera.org)
REDIREDY TAKARIVAIanao ry Masoandroko iny,
Mba fantatrao va re…
F’izaho aty tsindrin-daona, miandrandra ny fihavianao,
Ny foko mientana tsy hay ferana;
Manontany tena foana hoe hibaliaka ve ianao,
Sa zary ho taratra fitserana…
Fa izaho anie marofy rehefa injay ianao tsy tazana,
Fa toa takona any ho any;
Dia lasa saina aho, manonofy; azo vidiana sa tambazana
na dia ny anaranao ihany?
Izaho koa anie mahalala fa toerana sy tany hafa
No efa voalahatra ho anao;
Nefa mifikitra tsy miala ny faniriako te hitafa,
Hanaraka sy hanjohy anao…
Ireo sombin-taratrao no vontoantim-pahasambarako,
Ampy mahafaly ahy;
Ary ny anaranao noraiketin’ny tantarako
No jiro manazava ahy…
Ryana
(23/07/08)
--------
Rohy:
Sokajy :
embona