VERY HEVITRA - Ryana

Azo vakiana?

VERY HEVITRA

Sambatra sy tretrika ny foko sy ny fiainako,
Vangian’ity masoandro;
Nanolatra ny feriko, nitony ireo tarainako,
Mazava teo ny andro.
   Saingy minitra vitsy no hany mba anjarako,
   Mandalo ihany izy iny;
   Ka zary hainzin-kitroka no manaron’ity làlako,
   Hatsiaka sy hirifiry.

Finaritra aok’izany ny masoko mibanjina
Ny volana baliaka;
Tanteraka anatiko ny hazavany lalina,
Ny tara-manjopiaka.
   Saingy tsy hitahita teo dia rahom-be mitraho
   No manarona azy iny;
   Ka toy ny voron-kely notinapa-kelatra aho
   Rehefa nidifiany.

Mitondra aina vao ny loharano an’ala
Raha sendra hetaheta;
Dia te hanaram-po, hitohoka tsy hiala,
Higoka ts’isy fetra.
   Saingy toa adinoko f’izy iny ho lasa ony
   Ka tsy hita intsony ho namana;
   Na te hiroboka aza aho, tsy afaka intsony,
   Hany heriko mitazana…

Ka very hevitra aho, tsy hitako ny hatao,
Inona no mety;
Mamy, tena mamy ny fihaonana aminao
Na dia hoe vetivety;
   Nefa mafy koa raha mafy ny miverina amin’ny haizina
   Rehefa nahita hazavàna;
   Ary fara-fahoriana, mangidy tena tsy azo laizina
   Ny hoe tia fa noraràna.

Ryana
(10/11/06)

Hevitra mandeha

scotlandyard (12/04/2007 19:33:10)

Iny masoandro iny sy ny hafanana entiny
Toy ny rano natsakaina mbola hody ventiny

Iny volana iny mazava sy baliaka
Nilaza fa ny fana, mety ho hatsiaka

Iny rano iny , raha nanala hetaheta
Mahafaty ihany raha nonoa tsy hita fetra

Ny zavatra rehetra iainanao androany
Tsy ho iny foana akory, fa miodina ny tany

Ryana (14/04/2007 17:15:54)

Mankasitraka!
Ryana

vanjanofy (27/04/2007 12:33:58)

Ny volana baliaka sy masoandro mody
mandalo ka tsarovy!
ny loharano an'ala, ny olona malala
hisosa sy hiala!
.... 'nga tsy manadala !???

Hametraka hevitra

Midira aloha

Mombamomba

Mpanoratra : Ryana

Nampiditra : Ryana
Daty : 05/04/2007
Mpamangy : 1217
Mankafy : 0

Tononkalo hafa

MBA LAZAO AZY
HOY IANAO...
MANDALO IHANY (nadika avy tamin'ny “Ça passe”)
NANJARY TIAKO
NANJARY NEKEKO
ISAO TOERANA AHO (nadika avy tamin'ny "Fais-moi une place")
TIANY, HONO, AHO...
NY HERIKO
RAHA HO AVY
AZAFADY