RAVA HATREO (Solofomanjato)

Rava hatreo ny pitsopitson'ireo fikasany te-handrobona.
Rava hatreo ny fikatrohan-doha nohirifan'ito tanjony.
Foana, potika, sy hoto, no zary kina sy nirodana.
Fa marivo fanotofana, nanantena ambangovangony

Tsy tamn-java-naharatsiana hoe nalahatry ny anjara.
Na koa aza indrisy anefa somaingisaingim-bintandratsy.
Toa voara tsisy endrika no sady vitsy mpahalala
Ka namadika ny toky, ho poizina misoko anaty.

Hikaika ozona hamely ?
Sa hanony ny sahato ?
Moa tsy ireny velively
No antenainy hampiato
Ireny potra-dranomasony
Tan-tsento lalina niloatra
Te-hipoaka… ny antsoantsony
Hikika mafy ka hitroatra
Hiantso indray ilay efa lasa
Any ankoatry ny tsinapa.


Hitomany ve ?
Higoika mafy no hikika valifatim-pahafatesana
Sady vonona hanampatra handrangotra ny tsy hay refesina.
O ry boboka sy lo, efa rotan-karafesina.

Hiantsoantso ve ?
Handrombaka sy hitsiramby amin’ny tsy hita anoharana
Tsy tsaroany ‘izato volo naparitaky ny tanana
Te hibeda, no manosika, te handao no sady miharana!

Hisarangotra aiza anefa ?
Fa teny maro tsy hita isa te hivoaka indray miloaka
Toloko sy hehy mifangaro samy te hanarak’efa;
Ry fasana ô, nahoana ianao no tsy nilaza nefa hipaoka

Fa tsarovy !
Ao ny Tompo, tsy mandao.
Ka mihaino ny ao am-po,
Izy, tena tia anao.
Sady te-hamonjy koa.




SOLOFOMANJATO
( 10 Novembre 2008 )
--------