You are here: home > Vetso

FOLO AOGOSITRA - Toetra RAJA

Azo vakiana?

FOLO AOGOSITRA


Nisy teny
Ombieny ombieny
Re nanako
Izay nombako.
Tsy somonga
Fa nanonga
Moramora
Isan'ora
Ilay feo
Naneho
Fahasahiana,
Fitakiana
Ny hanjerana
Ny lalàm-
Panorenana,
Hamerenana
Ny very
Sy niery.

Olona
Mpitolona
Maro be
No nandeha
Nitanjozotra,
Nipololotra
An-daharana.

"Fiakarana"
No baiko
Nolanjaiko,
Lanjainao.
Ny "andao"
Hankany
Hatrany
No renao
Tam-birao
Nitaona anao :
"Izao dia izao".

Nihamaro
Nifangaro
Tsy isaina
Ireo nisaina.
Vetivety
Dia hety
Ny arabe.

Ho aiza hoe ?

Hidongy,
Hitrongy
Tsy hihamba
Ny mandan'
Ireo ngeza
Mafy seza.

Indrisy
Fa nisy
Feo nandratra
Vatravatra
Tamin'ny haino
Ka isaino :
Mpianakavy
Aviavy...
Hoe "hivoatra"
No hamboatra
Sambo fiara
Tena tsara !
Ny vahoaka
Dia havoaka
Ho rano
Sy angano.

Tsy voky
Fa toky
Fitaka
Mandripaka
Tsy resy
No asesy.
Tsy afa-po
Ny ati-doha
Be kiry.

Fa aina firy
Moa izao
No nandao
Ny tany ?
Moa izany
Tsy hampiana
Any aoriana ?
Tena sahy
Fa tanin-drà
No amokaram-
Pamaharana !

Tsy nitony
Intsony
Ny vahoaka
Fa napoaka
Ny rindrina
Mpandrindrina
Habibiana
Fidongiana...

... Indreny
Niray teny
Ny Daholo
Tamin'ny "folo
Aogositra".

Voahosotra
Finoana
Ireo nirona
An-dàlambe :

"Diam-ben'
Ny fahafahana"
No niarahana
Natao.
Lapa vao
No ao an-doha :
"Iavoloha" !

Tsy hitsoaka
Ny vahoaka
Te handray
Amin'izay
Fitondràna
Sy lalàna
Vaovao :
"Izao dia izao".

Ts'isy basy
Ragasy
Te hahazo
Raha nihazo
Ilay lapa ;
Fa "kapa",
Sy "Baiboly",
No ody voly ;
Aponga
Mampanonga
An-tsakelika.

Niherika
Ary aho...

...Nifamaho
Niova volo
Ny tontolo !
Tena ady
Grenady
Tifi-basy
Malagasy
No niseho.
Fa feon-
Tomany
Hiaka izany !
Vavy, lahy :
Boba rà,
Nisy maty
Trobaka àty
Ny naratra
Vaky tratra,
Niongo-bolo... !

Ny "folo
Aogositra" :
Nandositra
Iny aho,
Nitalaho
An-tanimbary,
Narary
Vaky fo
Fa nahavoa
An'i Kala
Ireo bala
Nafafy
Olon-drafy.

Tsy adinoiko
Ato am-poko
Ilay masoandro,
Ny andro
Sy ny ora :

"Maritiora
Ianao ;
Ny anaranao
RaMalagasy
Tsy voatasy ;
AKANJO BA
NO VONTON-DRA
FA IANAO
DIA VAOVAO !"

Toetra RAJA
Desambra 1991

Sokajy : Tanindrazana

Hevitra mandeha

bichette (02/08/2004 08:20:48)

tena tsaroko tena mafy ireny fotoana ireny, hatarmin'izao aho rehefa mahare elikoptera dia tora-kovitra

betroka (05/08/2004 08:17:22)

Eny tokoa ry Bichette, tena ady ireny fa tsy adiady. 13 taona lasa izay !

andriary (14/10/2004 14:44:43)

mampisento ity tonokalo ity!
tantara...

toetra (14/10/2004 21:27:10)

Araka ny hevitro dia andro manan-tantara ny 10 aogositra 1991, na dia misy aza ireo mpanao politika tsy miombon-kevitra amin'izany.
Marina ny anao ry Andriary fa manana ny anjara birikiny ny poeta eo amin'ny tantaram-pirenena.

amfhaja (18/06/2005 08:58:39)

hahatsiarovako olona iray izany ny 10 aogositra, olona nitaiza ahy. Raha ny hevitro de tsy rariny mihitsy ireny nefa iza moa no afaka hiteny?
na ny olona nitarika aza t@ireny nivadika indray zao