Lozoka (tsiolaka)

Nandao ny vahindanitra misarindraozy vetivety
ka niezaka nizaha ,nitsidika ny tany
Nisodika,nisidina,niezaka nitety
hatrany ampara-lalina tsy takatra am-binany.

'ndrao ahita fangorahana sy tsatom-pitiavana
na dia antsiririn-jingan'ny rano ody aina
saingy loharano ritra namela tany ngazana
lohasahan-tsento hipokipoka taraina.

Fa efa lany vatsy sy feno fifandirana
akanin-donilony, valifaty tsy anerany
Ilay anjely mpiambina nanaikitra sy nihinana
ny reny velom-bao no mitono Ilay naterany

naleoko sarimonina fa andrao ho valovotaka
ho tamamiray amin'ny tafika masiaka
tsy manam-pitiavana fa efa zatra rotaka
tsy mahita fitsaharana anaty lalan-ditra
--------