HO AN'I ZANDRY (VOLAFIHA)

Raha hitia indrý Zandry dia izao no tadidio:
Tantely sady vahona io fitiavana io.
Indray mba mampifaly, mahasambatra aok’izany;
Indray toa mpampijaly, mandrotsaka tomany.

Maro ireo milaza hoe: ianao tiako be!
Dia manangolingoly, dia jereo anie fa
Ianao manontolo omeny dokadoka,
Omeny tokitoky, omeny lokaloka.

Aza mora renok’ireo tsara teoria;
Ataovy an-tsaina foana fa afo ny fitia.
Sarotra fantarina ny marina fanahy
Ka mba tsy hampivarina: manàna ahiahy.

Raha vonona hitia: tiava tsisy antony
Tiava ny halemeny, tiava ny hakantony
Aza miaitraitra hanenji-bitro roa
Tiava anankiray, tiava amin’ny fo.

Ny fitiavanao anao sy azy aza afangaro,
Aza omena laka ny hasarotam-piaro;
Raha fitiavan-tena no hitiavana ny tiana
Dia sady mampihena no manafa-pifaliana.

Raha hitia indry Zandry dia tandrovy aky ny tena.
Ianao ambany rahona mety mba ho lena.
Nefa na izany ny hasinao aloha tano
Andraso ny fotoany dia ho samba-tokantrano!!!
--------