Sento miampita III (Vonjisoa ANDJANIRINA (RNMv))

Somambisamby indray ‘ty takariva kely,
Matoa ilay tsiriry vorona nandao
Namonjy ilay fodiany, nikopaka ka niery
Ilay sakaiza tiany no io tavela teo.

Tazan-davitra ihany toa maso indray mitopy.
No entiny hibanjinany ilay moron-danitra iny.
Ilay rahona misosa sisa hananan-toky,
hampita izany sento ampon’ila niriany.

Io ery fa tazana ilay volana mitranga,
Baliaka rimbina ila, toa manambra feo
Milaza ny tontolo fa efa dify angamba,
K’ampitso indray vao ho hita, ‘lay masoandro teo.

Sentosento irery no hany hanantenany,
Ny fotoana ihavian’ilay oran’ny fitiavany.
Sy jiro mitsilopy hanampy ny hazavan’
Ilay sento iray miampita, ho ao ampon’ny havany.
Vonjisoa ANDJANIRINA (janoary 2023)
--------