"RATSIRATSY VINTANA" (Zavona Rakoto (AQUARIUS))

Avy nikarama kanefa toa nanavy
Farofirofy paosy fa nisy namosavy
Jonetra ampara-tseza mandinika kodiarana
Mila tsy hahavita mianika fiakarana

Avy mba niremby ka hiditra an-tanana
Kanefa ito paosy dia mbola tsy salama
Lasalasa saina fa tsy manana atolotra
Ahoana no fijery iretsy zaza maina molotra

Lasa teo ny saina ka zary niari-tory
Tsy nitondra nody fa atody boribory
Tsiaro ratsy ity ! hoy ny fanenenako
Na ny vadiko aza handatsa anao ry tenako

Tampoka avy teo, niposaka ny anjara
Mangamanga folo no indro nitsirara
Nisaorako ny vintana, jineriko ny lanitra
Tena misy marina ny tanan’Andriamanitra

Tsy ora iray akory no dila dia injao
Trema lahy iray no tonga tsotr’izao
Ketsa roa hoy izy ny ahy no very teto
Ka mino aho fa ireto noraisinao ireto

Nahinjitro ny tanako, nomeko ireo fa azy
Narary loha koa aho fatoy ny hoe voasazy
Ratsy vintana aho ! ekeko ! tsy maninona
Ny tompo nanome fa izaho no tsy nambinina

Zavona Rokoto Antsirabe,22 novambra 2022
--------