LASA TSY NIMPODY (Zoana15)

Raha vao telo volana monja nahitana masoandro
Ity zanantsika izay nirina fatratra
Dia indro ianao lasana, tena tsy voasakana
Niala tato antrano, izahay tsy nahafantatra

Ny hany teninao dia andeha ianao hilalao
Natakalonao baolina izaho sy ny zanakao
Niezaka nanakana, ity Renin-janakao
Indrisy ny hilalao ihany no hany tao an-tsainao!

Fahasahiranana, adin-tsaina no hany niainanay
Ianao tsy niasa saina, fa iny aho no lasa izay!
Avelako eo aloha nareo fa zaho andeha kely
Hoy mihintsy ianao, nanoroka ity zazakely!

Afaka telo andro ny nandehananao
Dia indro tonga ny hafatra avy amin’ny zokinao
Midina ianareo mianaka fa tena voa lery
Izao dia izao nareo dia tsy maintsy tonga aty!

Fahasahiranana, hakiviana no nanjo ny tena
Raha nahita azy nivalapatra izay tena nahonena
Tsy nisy intsony azo atao na dia niala nenina
Ny hany azo atao dia nigogogogo tsy hay nafenina!

Fotoana fohy no niarahana, dia tonga fisarahana
Izao angamba no anjara, ka tsy maintsy zakaina
Madria am-piadanana izay no azonay lazaina
Ny anay mianaka ny tohiny mbola tsy hita ho tantaraina!
--------