Ho an'i neny (anarim)
(Nalaina tao amin'ny vetso.serasera.org)
A Neny, la mia mamma di cuore Telo taona lasa izay raha nifanao veloma isika,
Dia tena am-pitsikiana fa hoe mbola hifankahita…
Kanjo, indrisy, ankehitriny, ny ranomasoko tsy ritra
Fa ianao hoe làsana any, izaho aty mipitrapitra…
Izato saiko toa tsy mino na dia hoe anarako aza
Fa mitady lalan-kafa, mody adala toy ny zaza
Hoe ianao tena nandao, tsy ho itako intsony ?
Ka zary tena sarotra amiko ny miezaka ho tony!
Eny e,
Izato foko te hitroatra sy hikikiaka mafy,
Nefa tsy afaka manoatra fa mangina dia mihafy.
Hitroatra ho aiza tokoa moa fa izao no fandaharana
Izay voatendrin’ny Tsitoha ka dia Izy no amaharana…
Ka ny sitrany ho tò, na tena mafy sy mangidy
Dia ononina ny fo satria tokoa izao no didy,
Koa mandria am-piadanana re ry neny tena tiako
Manantena mbola hihaona rehefa tapitra ny diako…
Any andro, any ora, hotsaroana hatrany ianao
Dia hitsiky moramora izahay nilaozanao
Ka ireo asa soa izay efa natombokao
No hotohizanay hatrany mba ho reharehanao.
Izay kely vitanay dia hataonay am-pitiavana
Araka ilay hafatrao hoe “manaova soa iadanana”
Dia hiezaka izahay tsy handraraka ilo mbý an-doha
Ka hanolotra sy hizara izay tena avy ao am-po!
Neny, mbola hihaona rehefa tonga ny maraina vaovao !
[Nosoratany ho an'i neny, Dr Juliette Rasoarivony, izay nodimandry tatý Roma (Italia) ny 25 janoary 2022 teo.]
--------
Lien: