SATRIA FENO (Ryana)

SATRIA FENO

Rehefa hitanao fa mendrika sy kanto
Ny tontolo izay jerena;
K’izay lalovanao mirindra sy milanto,
Ts’isy intsony mahasorena;

Rehefa ny hafaliana no tsapanao mivoaka,
Miboika avy ao anaty;
Raha toa fahatoniana no asetrinao ny traotran’
Ireo mandrahona sy miantsy;

Rehef’ianao mamindra fo ka tsy mitazona alahelo
Amin’ireo nisetrasetra;
Ka nalevinao ho lo, ho foana mbamin’ny avelon’
ireo ratsy vitany rehetra;

Rehefa ampy ho anao ny hoe tia ianao ka tiana
Tsy manontany hoe nahoana;
Ka faly, afa-po ianao satria tojo izay niriana,
Tsy ahoanao ny fotoana…

…Dia satria feno ny fiainanao,
Feno ny fahasambaranao,
Feno ny aminao rehetra,
Hafenoana ts’isy fetra!

Ryana
(01/10/08)
--------