INONA MOA IZAHO? (Skual)

Inona moa izaho fa « taomobilina » kapoaka
Rohitina amin’ny tady any amin’izay tianao andehanako
Ianao no fitokisako ka n’inona hipoaka
Handroso foana aho raha hazominao ny tanako


Inona moa izaho fa ilay hena antanan-tsaka
Tsy mikofoka intsony fa voafikitrao mafy
Ilay fitia anatiko ao anie ka tena latsam-paka
Tsy haiko akory izany dikan-teny hoe mampirafy

Ary ianao kosa ary mba inona e?
Ataoko hoe Andriana angamba?
Ny foko mantsy tsinona
F’ilay andevo kely jamba

Manaiky ho babo mora fotsiny
Manaiky anao ho Andriamaniny
Ianao no hany rotsirotsiny
Ianao no tokana sy maminy
--------