FERY ANATY (SOLIMAH)

Reko misosa eto ambony fandriana
ilay aingampanahy tsy fanta-piaviana.
Tsy takatro loatra izay tiany holazaina
fa emboka hafa mandoro ny saina.

Vangongon'ny alok'ireo taona lasa
no injao miady sisina sady mikasa,
Misisika mafy hilafika an-doha.
Manery ahy hitroatra, manery ahy hifoha.

Mba inona loatra no tanjon'izany
Fa tsy azoko veroka, tsy azo vinany?
Karazana diary misafotofoto
no injao mifanjinja ato anatin'ny foko.

Toheriko ihany , kanefa tsy laitra.
Vao mainka manindrona sady manaitra.
Torovana mafy aho, kinanjo tereny
handrafitra ireny karazany ireny :

Dia nisy ireo bainga tsy vita navadika,
Ankoatran'ny tolom-panahy rakotra ady
ka zary nametraka ratra ao anaty.
Nitondra takaitra aho fa mbola tsy maty.

Dia nisy ihany koa izany rano maria
tsy maintsy nodiavin'ny lakam-pitia.
Andanin'ireny ilay rivo-mifofo.
Soa ny herin-tsaiko fa mbola tsy niofo,...

Sahala amin'izany ny ampahan'ny tolona.
Iaretana , saingy toa mihamamololona.
Dia izay ilay aretin'ny tia soratsoratra :
Anaty eritreritra no mihorakoraka.

Mba mody mandefa vinany mangina,
Kinanjo ao am-po ao tsy zaka toniana!
Manafina fery amin'ny endrika ivelany ,
Mirongatra anaty ny vony sy felany.

S O L I M A H✓
Septambra 2025
--------