Ry alina (Vonjisoa ANDJANIRINA (RNMv))

Ry alin'ny tomaniko!
Aza omenao tsiny izany sentosentoko,
Tsy vatrako nafenina.
Tsy vokatry ny nenina akory sanatria;
Fa dobok'onjamafin'ny aloka fitia
Manenika ny lalako, dia...
Misento aho.
Dia mpisakaiza isika,
F'ianao tsy mahazava izay anton'ny hetraketraka,
Izaho tsy mahavaly izay anton'ny tomaniko, fa...
Tsy resy aho,
Raha misy ambara ianao, etsy mamalia!
Dia ho reseko lahatra ny foko mba hangina,
Dia hoy aho : Ry foko, Mitonia!

Fa iny volana iny,
Tsy azoko fehezina hanazava ny aliko
Ny alin'ny tomaniko,
Niangaviako ihany hitatitra ny hafatro
Ho any ambadika any, saingy
Nolaviny aho, ka indro nidifiany,
Dia horafesiko izy ho zary fahavaloko,
Satria nilaozany aho anatin'ny tomaniko.
Nefa, tsy sahy aho.
Raha renao izao ry volana, tongava mamangia!
Dia ho reseko lahatra ny saiko ahatsiahy anao,
Dia hoy aho: Ry saiko, mandiniha!

Vonjisoa ANDJANIRINA (23/11/2025)
--------