NODIMANDRY (LAVENONA)

NODIMANDRY

Andro mbola maizina, Talata vao maraina
maso mbola ditsoka no nilazana tamiko
fa vita hono ny iraka izay notontosaina
ka hody an-tanindrazana ilay Dada tena mamiko !

Mba faly ery ny tena namonjy teny ivato
naniry efa hatry ny ela ny hahita azy indray!
mihitsy mitamberina sy tonga an-tsaiko ato
ilay izy vao hanainga, eritaona lasa izay !

Tsy nahitana teny nefa ny olona nitsena!
I neny koa tsikatitro nandrotsaka tomany
Nanomboka nangina aho sady nanontany tena...
dia ho sanatria ve ? Aza misy anie izany...!

Tonga ny fotoana dia niezaka aho nitony
Teo izay vao fantatro ny tena zava-misy !
Ilay dadako malalako tsy namana intsony
fa razana iny sisa !....indrisy ka indrisy..!

Toy ny nofantsihina ny tao am-poko tao !
i neny moa tsy tana fa dia torana avy hatrany !
Dada o! Ndeha atao hoe tombon-dalana ny anao
fa...raha mbola olombelona tsy maintsy handao ny tany !

LAVENONA
--------